Напаѓачот, кој во неделата утрото во ноќниот геј клуб во Орландо уби најмалку 50 луѓе, двапати бил проверуван од неговиот работодавач и не било најдено ништо сомнително, објави компанијата во понеделникот.

Компанијата за обезбедување G4S потврди дека 29-годишниот Омар Садик Матин, американски државјанин роден во Њујорк од имигранти од Авганистан, за нив работел од 2007 година.
„Матин е безбедносно проверен кога дојде во компанијата во септември 2007 година и проверката не упатуваше на ништо сомнително. Проверката е повторена во 2013 година“, изјави за Reuters портпаролката на компанијата.
Претходно во објавата на Twitter компанијата изразувајќи „шокираност“ од настанот во Орландо, објави дека ќе соработува со сите органи кои се вклучени во истрагата.
Како што претходно беше објавено од американското Федерално биро за истраги (FBI), Матин бил двапати иследуван, во 2013 и 2014 година, а компанијата G4S во 2013-та добила информации дека FBI го истражува, но истрагата тогаш била затворена. Компанијата немала никакви сознанија за врските на Матин или за евентуални терористички активности, како ниту дали FBI подоцна го истражувал, додава портпаролката.
Според податоците од јавни извори, седиштето на компанијата G4S е во Лондон. Таа има филијали во 125 земји во светот, а вкупно вработува повеќе од 620 илјади луѓе.
Како што утврди досегашната истрага, Матин добил две лиценци за поседување оружје. Една седмица пред нападот во една продавница на Флорида, тој купил автоматска пушка и пиштол, со кои го извршил својот крвав поход во Орландо.
Поранешната сопруга на Матин изјави за американските медиуми дека тој бил емотивно и ментално нестабилен и имал насилен карактер. Ситора Јусуфи, 29-годишна, изјави дека членовите на семејството „ја спасиле“ од поранешниот сопруг по четиримесечниот бурен брак во Њу Џерси, кој завршил со развод.
Според полицијата во Орландо, Матин дејствувал сам и по тричасовната заложничка драма во клубот е застрелан во престрелката со полицијата.
Како што објавија американските телевизиски мрежи CNN и NBC News, постојат информации дека Матин во јавување во текот на нападот на телефонската линија за итни случаи изразил лојалност на екстремната џихадистичка група Исламска држава. Агенцијата AMAQ која е тесно поврзана со џихадистите објави дека тој бил нивен „борец“.
Од своја страна, таткото на убиецот од Орландо, Садик Матин кој е дописник на авганистански сателитски телевизиски канал од САД, изјави дека чинот на неговиот син „нема ништо заедничко со религијата“. За телевизијата NBC News, таткото изјавил дека тој многупати остро реагирал на јавните пројави на приврзаност кон еднополовите бракови.
Сенаторот од Флорида, поранешниот кандидат за републиканската номинација за претседателските избори, Марко Рубио, во интервју за CNN изјави дека нападот во Орландо е чин на екстремист насочен против ЛГБТ задницата.