Бијонсе во сабота доцна ноќта го зацврсти својот статус на кралица на ненадејните објавувања на своите албуми, откако објави нови визуелен албум под наслов „Lemonade“, пренесуваат агенциите и потсетуваат дека оваа 34-годишна поп дива пред пет дена објави „трејлер“ за овој проект за кој се нагаѓаше дека ќе биде нов спот или телевизиска серија.
Станува збор за шестиот студиски албум кој Бијонсе го претстави со кусометражен филм кој премиерно е прикажен во саботата вечерта на HBO каналот.
Веднаш по премиерата на филмот, албумот стана достапен за преслушување на Tidal, каде и сега во моментов единствено може да се слушнат новите песни. Бијонсе подготвила дванаесет песни, вклучително и претставениот сингл „Formation“. Меѓу соработниците се Џек Вајт, Џејмс Блејк, Кендрик Ламар и The Weeknd.
Порталот Idolator пишува дека станува збор за најразновидниот албум на Бијонсе, и содржи од вистински беј-химни, преку едноставни емотивни балади, па дури и кантри звуци.
Албумот „Lemonade“ ги содржи нумерите: 1. Pray You Catch Me, 2. Hold Up, 3. Don’t Hurt Yourself, 4. Sorry, 5. 6 Inch, 6. Daddy Lessons, 7. Love Drought, 8. Sandcastles, 9. Forward, 10. Freedom, 11. All Night, 12. Formation.