Близу 40 луѓе се повредени по одењето преку жежок јаглен како дел од семинар за самопомош кој мотивацискиот говорник Тони Робинс го одржувал во американската сојузна држава Тексас.

Учесниците на семинарот под наслов „Ослободете го огнот во себе“, кој се одржувал во Центарот Кеј Бејли Хатчинсон во Далас, морале во четвртокот попладнето да побараат помош поради изгореници на стапалата и на нозете, изјавил во петокот Џејсон Ивенс, портпарол на противпожарната служба во Далас.
„Многу од учесниците биле повикани да чекорат преку жежок јаглен и како резултат на тоа многумина се здобиле со повреди“, додал Ивенс.
Целта на споменатиот тридневен семинар е да им се помогне на луѓето „да ги пречекорат сите граници“ и да го подобрат квалитетот на својот живот, според пораката на интернет страницата на Робинс.
Тони Робинс е популарен мотивациски говорник, личен финансиски советник и автор на книги кои добро се продаваат.
Според медиумските извештаи, од шест илјади луѓе кои од 2001 година оделе по жежок јаглен, 21 лице завршило во болница со сериозни повреди.
Повеќето луѓе ги избегнуваат изгорениците поради тоа што јагленот е бавен спроводник на топлината, но предолгото стоење во едно место заедно со други фактори го зголемува ризикот. Во сличен инцидент во 2012 година премногу луѓе учествувале во такво одење и создале редови што ги забавило, па некои се здобиле со изгореници.