Шпанскиот репрезентативен голман, Икер Касиљас, се наоѓа на чекор до поставување на нов рекорд во репрезентативниот фудбал, откако на пријателскиот меч помеѓу Романија и Шпанија (0:0) по 166-ти пат го бранеше голот на „црвената фурија“.
Легендата на шпанскиот фудбал на мечот во Клуж го израмни рекордот на некогашниот репрезентативец на Летонија, Виталијс Астафјевс, објави Европската фудбалска унија (УЕФА).
Касиљас во шпанскиот национален тим дебитирал на 3.јуни 2000 година, на натпреварот против Шведска во Гетеборг. Тој со Шпанија има две европски (2008, 2012) и една светска титула (2010).
Единствен од активните фудбалери кој може да го нападне рекордот на Касиљас е италијанската голманска легенда Џиџи Буфон кој има 155 настапи за „азурите“.