Претседателот на Европскиот совет Доналд Туск во среда ќе ја посети Македонија, како дел од агендата за изнаоѓање начин за менаџирање и решавање на бегалската криза, при што ќе оствари средба со претседателот на Република Македонија, Ѓорге Иванов.
Покрај Скопје, во неколкудневната турнеја ќе ги посети и Виена, Љубљана, Загреб и Атина, а целта на оваа негова мини турнеја е „градење на европски консензус за справување со миграциската криза и подготовка на Самитот со Турција закажан за 7 март во Брисел и Самитот на Европскиот совет на 17-18 март“. За време на турнејата Туск ќе оствари средби со генералниот секретар на НАТО Јенс Столтенберг и со извршниот директор на Фронтекс, Фабрис Легери.
Посетата на Туск на регионот е во контекст на неодамнешната одлука на Самитот на Европскиот совет да се врати ситуацијата кога сите членки на Шенген зоната „целосно ќе го применуваат Шенгенскиот граничен кодекс и ќе одбијат влез на надворешните граници на државјани на трети земји што не ги исполнуваат условите за влез или кои не доставиле барање за азил и покрај тоа што имаа можност да го сторат тоа“.
„За реставрацијата на целосното функционирање на Шенген зоната ќе биде потребно време и тоа мора да биде придружено од мерки за решавање на хуманитарните последици за земјитечленки што се погодени, како со хуманитарна помош за сириските бегалци и за земјите од соседна Сирија“, велат од Европскиот совет.
макфакс