Малиот црн „фијат 500 Л“ кој го користеше поглаварот на Римокатоличката црква папата Франциск во текот на неговата историска посета на САД во септември минатата година, продаден е на аукција за 82.000 долари, соопштија во саботата организаторите.
Аукција, на којашто се јавиле 19 понудувачи, траела само 11 минути. Учесниците кои лично и телефонски наддавале на Филаделфија ауто шоу-то, ги изнесувале своите понуди за „Фили фијатот на папата Франциск“.
Најмногу, 82.000 долари, понудиле Мајкл и Кејт Чепмен, сопственици на синџирот продавници „Chapman Auto Stores“, а парите ќе одат во прилог на Римокатоличката надбискупија во Филаделфија.
Папата Франциск се одлучи за „фијатот“ за симболички да ја искаже својата загриженост за природната околина, но и за да ја оддалечи црквата од сликата за претерана раскош.
„Фијатот“ беше еден од шесте автомобили коишто папата ги користеше во текот на посетите на Вашингтон, Њујорк и Филаделфија.