Кори Левандовски, шефот на кампањата на милијардерот Доналд Трамп, водечкиот кандидат за номинацијата на Републиканската партија за претседателските избори во САД на 8-ми ноември, уапсен е во вторникот на Флорида, бидејќи нападнал новинарка, се дознава од полициски извори.
Според полицискиот извештај, 42-годишниот Кори Левандовски,, е обвинет дека грубо ја зграпчил за раката Мишел Филдс, поранешна новинарка на конзервативниот медиуми Breitbart, на 8-ми март на Флорида, во текот на настан поврзан со претседателската кампања.
Филдс тврди дека Левандовски ја зграпчил спротивно од нејзината волја, како и дека на раката поради тоа ѝ останала модринка. Полицијата објави и видео на коешто се гледа дека шефот на кампањата на Трамп ја фатил новинарката за рака и ја повлекол наназад, па го товари за напад.
Трамп тврди дека Левандовски не е виновен и оти тоа ќе го докаже на суд. „Господин Левандовски апсолутно не е виновен. Ќе се изјасни дека не е виновен и со радост го чека денот во судницата. Целосно е уверен дека ќе биде ослободен од обвинението кое го товари“, соопштија од таборот на Трамп.
Законот на Флорида го дефинира нападот како „намерно допирање на лице против неговата волја“ и се казнува до една година затвор или со глоба од 1.000 долари.